ဗဟုသုတ

NUG က ခန့်လိုက်တဲ့ ဒုတိယဝန်ကြီး နော်ထူးဖော

NUG က ခန့်လိုက်တဲ့ ဒုတိယဝန်ကြီး နော်ထူးဖော

ခေတ်သစ်၊ ဧပြီလ ၁၇ ရက်။

အမျိုးသားညီညွတ်ရေးအစိုးရ (NUG) က ဧပြီလ (၁၆) ရက်နေ့မှာ ဖွဲ့စည်းလိုက်တဲ့ ခန့်အပ်လိုက်တဲ့ လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနရဲ့ ဒုတိယဝန်ကြီး နော်ထူးဖောဟာ စစ်ပဋိပက္ခဒဏ်တွေ ခံစားခဲ့ရပြီး ဒုက္ခသည်စခန်းထဲမှာ အရွယ်ရောက်ကြီးပြင်းလာတဲ့ နိုင်ငံရေးတက်ကြွလှုပ်ရှားသူ ကရင်လူငယ် အမျိုးသမီးတဦးဖြစ်ပါတယ်။

ကရင်အမျိုးသမီးအစည်းအရုံးမှာ ပါဝင်ပြီး အမျိုးသမီးရေးတွေ တက်တက်ကြွကြွ လုပ်ကိုင်နေတဲ့ တပြိုင်နက်တည်းမှာ KNU ခေါင်းဆောင်တဦးဖြစ်တဲ့ နော်စီဖိုးရာစိန်ကို အနီးကပ် ပံ့ပိုးပေးရင်းနဲ့လည်း ကရင့်နိုင်ငံရေးမှာ တက်ကြွပါဝင်ခဲ့သူဖြစ်ပါတယ်။

နော်ထူးဖောဟာ အမျိုးသမီးများအဖွဲ့ချုပ် (မြန်မာနိုင်ငံ)ရဲ့ ကိုယ်စားပြုအနေနဲ့ ဖက်ဒရယ်ဖွဲ့စည်းပုံ မူကြမ်းရေးဆွဲရာအလုပ်အဖွဲ့မှာလည်း ကိုယ်စားပြုပါဝင်ခဲ့ပါတယ်။ တပြိုင်နက်တည်းမှာ စစ်ပဋိပက္ခကြားက ဆိုးရွားတဲ့ လူ့အခွင့်အရေးချိုးဖောက်ခံရတဲ့ အမျိုးသမီးတွေရဲ့ တရားမျှတမှုတွေအတွက်လည်း စွမ်းစွမ်းတမံ လုပ်ဆောင်ခဲ့သူတဦးဖြစ်ပါတယ်။

နော်ထူးဖောဟာ တန်းတူရေး၊ ဒီမိုကရေစီရေးနဲ့ လူ့အခွင့်အရေးတွေအတွက်အပြင် ဆိုးရွားလှတဲ့ အမျိုးသမီးလူ့အခွင့်အရေး ချိုးဖောက်ခံရတဲ့ အမျိုးသမီးတွေကို ကိုယ်စားပြုပြီး တရားမျှတမှု ရဖို့အတွက် UN နဲ့ နိုင်ငံတကာအသိုင်းအဝိုင်းမှာ နိုင်ငံတကာ စည်းရုံးလှုံ့ဆော်ရေး အတွေ့အကြုံတွေနဲ့ ရင့်ကျက်နဲ့ ကရင်အမျိုးသမီးတယောက်လည်း ဖြစ်ပါတယ်။

ဒါ့အပြင် ၂၀၁၅ ခုနှစ်က တိုင်းရင်းသားလက်နက်ကိုင် အဖွဲ့ ၁၇ ဖွဲ့နဲ့ ဖွဲ့စည်းခဲ့တဲ့ တနိုင်ငံလုံး အပစ်အခတ်ရပ်စဲရေးဆိုင်ရာ အဆင့်မြင့် ညှိနှိုင်းရေးကိုယ်စားလှယ်အဖွဲ့ (Senior Delegation – SD) အဖွဲ့ခေါင်းဆောင် ပဒို နော်စီဖိုးရာစိန်ကို အနီးကပ် ကူညီပေးခဲ့သူလည်း ဖြစ်ပါတယ်။

တန်းတူရေးနဲ့ တရားမျှတမှုကို လိုလားပြီး တစိုက်မတ်မတ် တိုက်ပွဲဝင်နေတဲ့ နော်ထူးဖောဟာ အမျိုးသားညီညွတ်ရေးအစိုးရက ခန့်အပ်လိုက်တဲ့ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနရဲ့ ဒုတိယဝန်ကြီးတာဝန်ကို ကျေပွန်အောင် ထမ်းဆောင်နိုင်မယ်ဆိုတာ သံသယဖြစ်စရာမရှိပါဘူး။

သူမရဲ့ ဖြတ်သန်းမှု၊ ကြီးပြင်းလာတဲ့ အနေအထားနဲ့ တန်းတူရေးနဲ့ တရားမျှတမှုအတွက် ခိုင်မာတဲ့ ယုံကြည်ချက်ရှိတဲ့ သူမဟာ မြန်မာနိုင်ငံက စစ်ပဋိပက္ခကြားက မြေဇာပင်ဖြစ်ရတဲ့ ပြည်သူတွေအတွက်သာမက တနိုင်ငံလုံးက ပြည်သူတွေ အထူးသဖြင့် အမျိုးသမီးတွေအတွက် အကောင်းဆုံးလုပ်ဆောင်နိုင်မယ့်သူဖြစ်ပါတယ်။

The Union Times ထံမှ ကူးယူဖော်ပြသည်။